حمى الأسعار ,, بقلم الأستاذ ,,, ياسر شرف

حمى الاسعار
========
فكرت فجأة وانا محتار
ايه السبب لحمى الاسعار
وروحت مستشفى بخمار
متخفى اعرف ايه الاخبار
ولقيت ده كله مولع نار
دخلوا جهنم عشان كفار
وقلت يعنى فى جنة ونار
والحظ يرزقنا بكفار
ولا سعر واحد من الابرار
كله بيغلى يخش النار
كانوا زمان حلوين اخيار
دلوقت يعنى اكيد اشرار
ايه اللى غير فى الاخبار
وبيعبدوا ليه الاصنام
ارتدوا ليه ده العقل احتار
وعشان كده بيخشوا النار
ودخلت غرفة الانعاش
يمكن الاقى فى واحد عاش
ولقيت ده عنبر الاسعار
والترمومتر مولع نار
حالات كتير والعقل احتار
بصل ولوبيا ويا خيار
وفول وعدس واى خضار
وزيت وسكر نار النار
وفول فلافل برضه كمان
جبنة وزبادى مع الاغنام
والرز محشى كده بيفور
حتى البقول ولبن العصفور
والكهربا مع مية ونور
وبوكسرات مع اى هدوم
واللحمة يعنى مع البروتين
وأسماك فى مية او حتى حمير
والكل داخل كده فى سباق
من قبلى يعنى لحد بولاق
ومن بحرى برضه بكل غباء
لحد شبرا او للوراق
كله بيسبق كده بجنون
ونتيجته مفروم او مطحون
لفقير وساكن كده فى قبور
بيكح صرخة تهز الكون
اما الغنى دايما مستور
المصل عنده بنوك وقصور
وسألت دكتور هادى مختار
ايه السبب فى حمى الاسعار
قام رد قال لى بكل وقار
فيروس واسمه يعنى دولار
زى الوبا او حتى طاعون
بيخش يفرم كده بجنون
يحرق يولع فى الأسعار
ويجى لها حمى ويا سعار
أوسخ واخطر من السرطان
بيخلى كله يولع نار
وقلت استر يا ستار
اكفينا شر عذاب النار
وخرجت اجرى من الاسعار
مرعوش متكتك وانا محتار





 

****
مع تحيات الفقير إلى الله
ياسر شرف
كبير محررين مترجمين
باتحاد الاذاعة والتلفزيون