مقتطفات بقلم الأستاذ ,,ادريس جبيلو

ايمتى نصبح فنان
نطق وتار اللسان
بلحان حروف تغني
كلام تايه هيمان
جابو الريح لودني
بلا شوار بلا اعلان
دخل باغي ينبشني
اداه وردو القبطان
صاب شداه يفيدني
ضربلو الطر مزيان
وخلاه من تغرادو يزيدني
تراقص عگيگ اللوبان
وتكبل بخيط شويطني
بالشبة وحصلبان
يتفك صراح جنيني
ايمتى نصبح شبعان
وما البحور مايگدني
ايمتى نصبح فرحان
وجرح السويطة ماهجرني
ايمتى نصبح فنان
وفمي مافرح ودني
بقلم ادريس جبيلو

****

الزمان
الزمان كنش
مقالو فلوح المكتاب
هتوف محمومة
حروف مهمومة
قصة ف كتاب
تفرقت اوقاتها
ع القمرة والشمس
منازل تحكي
ع الجن والانس
برد وجريحة
حملة ووحال
عجاجة مليحة
متشة وموال
تشطح خيوط السما
ف عين الرحمة
ورد وزهر
ربيع ونوار
ف فدان الدوار
تنادي ع المنجل
تباندة وصباعيات
شواطة غمرة
فالقاعة ومونيات
صفي ودري
ع الحبة بري
خزنها لعنق العام
وقت نتوحشو الكلام
وتناجي السما الارض
بخيوط الالهام

بقلم ادريس جبيلو

***

بحال داك العام
خذ واعطي
تعيا ماتغطي
ياالمعطي
هاداك جطي
اداك المسطي
عليها كتكليطي
باغية تعفطي
ع المعيطي
لراسو باغية تشوطي
شوفي الامن تلوطي
والله عليا ماتحيطي
ولا ليا تبوطي
وخ تعيا ماتزريطي
هاد العام
بحال داك العام
هرست التخمام
دگدگت الاحلام
وخرجت لليام
بلا كلام
بلا لجام
بلا وشام
وبلا تزمام
من السلام
يبان العلام
طلب المدام
او رزق لفام
او شي سام
عليهم حام

بقلم ادريس جبيلو

********

الحب
بصدق صوابي
بدفى محرابي
وحنان مكتابي
ؤود قرابي
گلستي بجنابي
على عرش كتابي
اللي دونتو حروف
قرا وشوف
القلب الملهوف
يغزل لهتوف
لفيف ؤملفوف
والحب معروف
حرموه علينا
وحللوه عليهم
هما والدينا
وحنا حنة يديهم
عارفين كيف جينا
بلا مانحشموهم

بقلم ادريس جبيلو

****

 

المحنة والمحنة
ارميت الحنة
ف يدي زواق
تمنيت المحنة
ترضي لشواق
حلفت المحنة
توللي ادواق
تتحايل بالفتنة
تكسب عشاق
تحارب لهنا
تحرف المساق
تقبر املنا
تهرس الساق
تيتم ولادنا
تعادي لرفاق
تهدم حمارنا
تعدم لعناق
ضلمت ايامنا
وغلات لسواق
شوهت وجوهنا
وفرقتنا تفراق

بقلم ادريس جبيلو