بوح قلم الأستاذ ,, ادريس جبيلو

التفاحة
الليل مع النهار
قسمو لوقات
ودفعو للمگانة
تدير حسابها
وبدا التاريخ
يدون ف المسرحيات
التفاحة والقتيلة
بنار الفتيلة
شعلت هبيلة
قطعت الصلة
بالحب والخلود

الليل مع النهار
قسمو لوقات
ودفعو للمگانة
تدير حسابها
وبدا التاريخ
يدون ف المسرحيات
وحنا فدار الفنا
مشعترين الگانا
نعضو ف قفانا
انسفو صدقنا
المواثيق والعهود
الليل مع النهار
قسمو لوقات
ودفعو للمگانة
تدير حسابها
وبدا التاريخ
يدون ف المسرحيات
شوف وحد الشوف
اليوم كتر الخوف
بنادم وللى خروف
تغني بدمو لحروف
وتشطحو، بوتار العود
بقلم ادريس جبيلو

>>>>

 

انا وداتي
دخلت لداتي نقلب
لقيت شلا امراض
گلت نفحص ونجرب
جبرت شلا اعراض
واش المختبر يكدب
خاصني شلا اغراض
حللت الدم
لقيتو سم
وصلة الرحم
ماعندو ف الشم
ولا ف العلم
حاورت عقلي
گال لداتي سقلي
بكفوسك انا مطلي
بجمرك حروفي تغلي
ؤبهواك انا مدللي
گسست ع الگلب الحيران
لگيتو كحل قطران
محساد معاندي غيران
وسواس خناس فتان
يغزل العداوة بجنان
دخلت لداتي نقلب
لقيت شلا امراض
گلت نفحص ونجرب
جبرت شلا اعراض
واش المختبر يكدب
خاصني شلا اغراض

بقلم ادريس جبيلو

<<<<<

مالي يانا
حال وحوال
ومقال لهبال
بوهالي جوال
مايكتر تسوال
مجدوب فمو گوال
ينضم لحروف فموال
يغني القوافي بالگوال
مالي يانا
مانسعد بالهنا
ونفرح باللي نتمنى
نعيش مجدنا
ونقرا بلغتنا
نحلم ونصيبها فجرنا
روض مرياض الجنة
الكون انا فنو
التراب نعيش منو
الزمان نقرقب سنو
النهار نحكم وزنو
بالليل مانعرف شنو
من مور الگمرة دفنو
ولا اللقطة اللي دشنو

بقلم ادريس جبيلو

<<<<

مانا الا بشر
الشدق حرار
والعيشة ولات مرار
الصاحب يبيع لسرار
العدو يشري لخبار
الفايس زوى اللي ف الدار
ماتعرف النافع من الضار
كلشي صبح قبيح وحار
واللي تسولو كيف سار
يگول مانا الا بشر
ضعيف ومعرض للخطر
يلزمني دعاء اللطف ف القدر
الحكمة وحسن النظر
تعانق لحيا مع الصبر
وبكاو على ما ظهر
من السيبة والغدر
وما بقى ف الدنيا غير
اللهم ان هذا منكر

بقلم ادريس جبيلو

<<<<<

هذا ماحكاو لجدود
داك اجنان المطروز
ساكناه امي لعگوز
من بابو ماتگوز
حتى توصل لالة الحگوز
ويتگاد البكري مع المگوز
ويفرح سعيد وعزوز
ودير الكريمة ودينات الفار
يتگاد الليل مع النهار
يهجر القط كانون الدار
يخرج للمردغة داك الحمار
ويصبح الطريق سيار
بالربيع والورد نيار
يگولو هداك سعد السعود
فيه النحلة ترعى ف العود
الگرز مايبقالو وجود
والعگز ماتبقالو قيود
هذا ماحكاو لجدود
وسبحان الخالق المعبود

بقلم ادريس جبيلو

<<<<

 

 

عنداك
يلا ضرباتك يدك
على من تبكي
ويلا زلگت بك رجلك
على من تشكي
عنداك مع الحيط
تساطح
وتگول ضربوك
شي مناطح
وتبدا تكور ف الكدوب
والسراطح
وتكملها بتخراج العينين
والصناطح
والغدر بقلبك يتراقص
ويتشاطح
على خوك خصك
معاه تناطح
رد بالك من خيك
يسلت ليك الحويك
ويخون لك الصويك
يصبغك بصباغة الحكيك
ويدير منك بياع هويك
لداك اللي باغي يتفيك

بقلم ادريس جبيلو

<<<

شكون انا
انا عين العميان
انا شر الطغيان
انا بؤس النسيان
انا كابوس العصيان
انا شيطان الطوفان
انا بطش الانسان
انا ريشة الفنان
انا قلم الولهان
انا بحر العرفان
انا سيف العديان

انا الدفة بلا عنوان
انا النمرة بلا عدان
انا الوردة بلا فدان
انا النوتة بلا كمان
انا العين بلا ميزان
انا النفس بلا وجدان
انا الصومعة بلا ودان
انا المسلم بلا ايمان
انا الامة بلا كيان
انا البصمة بلا صبعان
بقلم ادريس جبيلو

<<<<

العطور فاحت
والعقل تخشع
لحروف ساحت
واللسان تزرع
السطور طوالت
والكلام تفرع
القصيدة باحت
والحب ترصع
بحورو فاضت
فدواخلي تورع
بقلم ادريس جبيلو