قصيدة بعنوان......موال شجن
إلي أبي..سيظل قلبك موطني
تفتكر فرقت معاك
لما قررت الرحيل من غير وداع
ولا كانش فارق مين عدوك أو حبيبك
اللي م القلب اشتراك ؟؟!
انت رحت وسيبتني
غرقان لوحدي ف دنيتي
وحاجات ف روحي بتنكسر
مع كل موجة تهدني
كان كل أملي قبل ضهري ماينحني
أفضل معاك
كان كل أملي إني أكون وياك فحضنك
يوم ما رحت وسيبتني ف لحظة ألم
إحساسي جوايا يناديك
مش كلمتين يتقالوا ليك
إحساسي بالنار اللي كوياني
بيتلهف عليك
وبشوف عنيك
نظرة عتاب
بتلومني ليه
ده أنا كل حته ف جتتي دايقه العذاب
ياللي إنت قلبك كان وطن
محفورة جوايا ابتسامتك
همستك صوتك وصورتك
وارتعاشة قلبي لما إيديا
تحضن يوم ملامحك
قوللي إي اللي باقيلي منك غير صور فوق الحيطان
ودموع فراق ما بتنتهيش
وجراح سنين مالهاش تمن
وحاجات كتير مابتتنسيش ولا عمره ينساها الزمن
تفتكر كانت كتيرة عليا كلمة
تودع القلب اللي ف الحزن اندفن
وعيوني ف الحلم اللي يجمعنا تناديك وبتسألك
ليه لما روحي بتحضنك بتشوف عينيك
في كل حلم يضمنا
موال شحن...؟!!
مع تحياتي
محمد محمد الطنطاوي
28/10/2016
0 التعليقات:
إرسال تعليق