خواطر ,, بقلم الأستاذ ,, إدريس جبيلو

الورد
الغرام اللي
عشق بالي
ماوجدته
والحرف اللي
يجرح اگدامي
مانضمته
الزين اللي
زاد ف هبالي
ماشفته
والحب اللي
هرسلي سناني
ماعشته
الكلام اللي
همس ف وداني
ماسمعته
والورد اللي
دمى صبعاني
مالمسته
المغزل اللي
غزل حايكي
مابرمته
والقنديل اللي
ضوى مكاني
ماشعلته
القلب اللي
غدره غرامي
اغتصبته
والعقل اللي
دوخه حبي
اعدمته

بقلم ادريس جبيلو
***

ضرب وزيد الغياط
يلا الريح عليا ساط
وسمعتي فراسي اساط
وشفتيني طحت اباط
تفركت والعمر شاط
وماعندي تحت ليباط
ماعندي صندوق احتياط
شكون يسمع العياط
ويشوف من حال الساط
اللي حرگو التسواط
ضرب وزيد الغياط
لفريزي يصفوه لمشاط
الغيس يحكموه لباط
ومن الجنة خرج الزلاط
حضي لسانك م التخلاط
حضي يدك م التجلاط
حضي رجلك م العفاط
حضي عينك م التبلاط
حضي راسك م الكشماط
يلا تسطى وريحو سخاط

بقلم ادريس جبيلو

***

گرعة بلا زلاگ
اللسان طوال
وتمادى لهذا وهاذاك
غنى شلا موال
على دادا وداداك
خرج جوال
من فم هذا لودن هاذاك
تزادو فيه شلا قوال
والحان على بابا وباباك

دوبو الحق ف الباطل
وماعف لاهذا ولا ذاك
وللى الشيخ يماطل
والحسانة صبحت بلا تفزاگ
گلت انوض اناضل
جاتني ضربة من ذا ولاذاك
عطبتني م المفاصل
وبقيت گرعة بلا زلاگ
بقلم ادريس جبيلو

***

الرواح
فين داك النساطة
الخنونة تسلطت
عليا سلاطة
مناخري تخنقو
وسالو
عند سريط الريق
گرازيا يعطيو الحريق
تبورش لحمي
وجبهتي حمات
ضارني راسي
ادگدگو عضامي
وركبني سقامي
الرية بدات تخرخر
تزوي وتقرقر
نكحب مانشبع
ضاقت فيا الروح
صدري مجروح
صوتي مبحوح
شدني الرواح
عطيوني فليو
نشرب منو ونشمو
على الله
عضامي يترحمو
خوكم راه مريض

بقلم ادريس جبيلو