نسيت الباسورد,, بقلم الأستاذ,,,إبراهيم الفيراوي

**نسيت الباسورد**
ب حنين الحرف المتخبي
ف لوحة مفاتيح
ينطق وكلامه ب يلالي
وخيالي شايفه بيشاور
ب اللهفة والقلب بيصرخ
من جوه سواد الكيبورد
اقرالك الورد
الصوفي العايش بيرتل
جواكي الفجر
وايات الناس
ب نايات بيصلي ويسلم
ف السفر اتامل تكوينك
انا كاهن
انا راهب
انا الشيخ العابد
انا دينك
ده انا ناسك

وانا ناسك وبصلي بحرفك
الساكن عطره ف مراسيلك
انا زاهد عيشك مكتوبلي
ابعد ويصدني حنيني
وبشبكة نت
ح اكتب لك
واتامل فيكي
الاقيكي الحب
ف كلام وعيون الاصحاب
حكاويهم عنك
او لومهم ليكي
وفرحتهم بيكي
ف الصحبة الحلوة ع المالح
وشواشي البحر بتتشاقا
ترمي ب حنينها ع السارح
و الليل
يعصرني هواكي ويسبقني
والقلب العارف
ال واخد منك 100 صدمه
اتكعبل فيكي
تتقفل الصفحة
وانسي الباسورد
بقلمي #ابراهيم الفيراوي