في السوق
*************
محكيه بالعاميه
*************
من شي يومين كنت في سوق كبير من هاي الاسواق الي صارت موضه, و نحن ما بنتسوق الا منها كمان لانها موضه.
المهم متل العاده دخلت وتجولت و ضيعت نص الوقت مركز بالموبايل و عبيت العربايه شي محتاجه و اشياء مو محتاجها بس جبتها لانها كمان ع الموضه.
طفى شحن الموبايل فانجبرت اروح للكاش احاسب, و الحق اشحن لحتى ارجع اربط رقبتي بالموبيال .
عند الكاش كل الناس ع الدور, يا ريت بحياتنا منتظمين متل الوقفه ع الكاش.
المهم كان قدامي تنين الاول زلمه كبير بالسن بيتعدى السبعين و الله أعلم, و انجليزياته خلتني افكر انه يوناني او روماني او شي بلد من نفس العلبه.
و يلي بعد و قبلي مباشرة شب طويل عريض انجليزياته مفرنسه , توقعت انه المغرب او الجزائر يعني او من نفس العلبه.
راس الدور الاشقراني كان ناسي يجيب الخبز هاد الطويل شو اسمه الفرنسي , ايوه اه اه شو اسمه ... اخ رحا عن بالي ... اصلا ما بحياتي اشتريتهه او دقته.
المهم ابو شقرا طلب اذن من ابو عرب يسمحله بوقت بسيط يجيب الخبز الي ناسيه ( و من هون انا ميزت الانجليزيات و اتوقعت الجنسيات) و هون انا خطر ببالي ردة فعل ابو عرب الشهم انه يستناه و انا ابقى مستني كمان و بعدي طويل كتير صار الدور.
و لكن صدمني ... لا مو صدمني ... في كلمه تانيه اكتر تعبيرا عن ردة فعلي ... شو هي شو هي ...اه ادهشني ابو عرب بتصرفه ... لك الله يسعده شو حبيته كمان هالنشمي.
ابو عرب حكاله خد هاي الخبزه مني و ما في داعي تروحي تجيب ... يعني الصراحه انا عجبني ... مش عارف انتو شو رأيكم بس لو شفتم وجه ابو شقرا و كلامه ... قال انا توقعت ما تقبل تستناني , بس كمان تعطيني من خبزات ( بالانجليزي طبعا) ما توقعت و عيونه فعلا كانت فيها فرحة متل فرحة ابني لما اناوله حبة شوكولاته ابو الغالي هداك يلي بالشهر مره بنجيبها ... مع الراتب يعني.. المهم فرحة ابو شقرا هاي خجلت ابو عرب لدرجة دار وجهه علي ... قلتلو الله يسعدك حاسب مستعجل انا بدي اطلع و راي شغل .
و حاسب و حاسبت و الله يهدي الجميع قبل ما يحاسب الجميع ... و تحياتي لكم
**********************
جاد عبدالله
0 التعليقات:
إرسال تعليق