حكاية بنت
كان فيه بنت إسمها ....
لا مش هاقولك إسمها
مجرّد ما تقرا كلمة بنت
كل اللي هاييجي ف بالك
إسم البنت اللي انت بتحبّها
هاتلاقي عنيها ساكنه ملامحك
و إديها راشقه ف الضلع الأيسر من صدرك
خالعه القلب بنظرة حب
مرسومه ضحكتها على شفايفك
و صوتها الساكن حنجرتك
بيشدّك لعالم من صنعك
موجود ف خيالك إنت لوحدك
ماحدّش بيشاركك فرحك و لا ألمك
تتألّم ف غرامها و تفرح
تتوه ف جمالها و تسرح
تاخدك لسابع سما
لو يوم رضيت عليك
و ف لحظه تلاقي نفسك
غرقان ف دموع عنيك
لمّا تمدّ إيدك
تلاقيها فاضيه منها
أحلام شحاته
0 التعليقات:
إرسال تعليق