وإتقابلنا ,, بقلم الأستاذة,,أحلام شحاته

و اتقابلنا
و اتقابلنا ف الحلم لكن ..
زي ما نكون في الحقيقه

نفس صوتك .. و إيديك
و نظرة عينيك البريئه
( وحشتيني .. وحشتني
بحبِك .. بحبَك )
داب جوّانا شوق
كان آسرنا من زمان
كان ساكن في أوصالك و أوصالي
فأوصى لك و أوصى لي
بإن اليوم اللي فيه
نتقابل و نتجمّع
تجفّف دمعتي بإيدك
و اطبطب عليك
كما الأم تزيل بإديها أدران الرضيع
و احبك و احبك و احبك
على قدّ ما تقدر تقول ..
قوووووول
و استنّى منّك كلمه
أزوّق بيها أيامي
أنشّف الدمع في عيوني
و انسج م الأمل توبي
إلّلي باحلم بيه من سنين و سنين
أحقّق حلمي إلّلي ياما هزّ كياني
أنسى بيك جحود أيامي و قسوة الليالي
ده الشمس كانت بتطلع و تنساني
و ترفض تبعت منها شعاع
يدفّي إديا الدبلانين
و لمّا تروّح تخلع قلبي من تاني
ترميه في بحور ظلام
أغرق في بحر أحزاني
أعدّ الليالي .. و الليالي طوال
أتبعتر في الليل الدامي
و الدنيا سواد قدّامي
أتزلزل تحت اقدامي
و اتفتّت فتافيت
و الملم أحزاني من تاني
أقفل شبابيك قلبي
و اضيع في اللاشعور
أفوق لحظات معدوده
أزحف نحو مرايتي
تصدمني التجاعيد
ألاقي وزني اختلّ
و الجرح منّي يطلّ
أجري في الفضا و الطلّ
أتقوقع جوّه نفسي
و احاول انااااااااااام
يمكن أشوفك في المنام
أحلام شحاته