حته منى ,,, همسات قلم ,, نور الهدايه

حته منى
بقيت أحسك
حته منى
لما أغيب
وآجى
يقولولى
قد إيه سألت عنى

لما الاقى ايديك
بتسبق دمعى
لو فى لحظه خاننى
لما أحس
إن فى بعادك
أنت
أقرب لى منى
لما ألاقى
صورتى فى عينيك
ساكنه تملى
لما أسمع غنوة قديمه
بيقول كلامها
عنك وعنى
لما وإنت بعيد وغايب ,,
أكلمك
,,وأحكى همسى
وألقاك قوام
رديت عليا
وسمعت حسى
لما أشوف
فى الحلم صورتك
بتناجى إسمي
لما أشوف
تفاصيل ملامحك
دايبه ف ملامحى
لما يوم ازعلك
وأكيد
غصب عنى
ألقاك فى لحظتها
نسيت
وجيت تشوفنى


لما تبقى نبض قلبي
وقلبي إيه
غير حته مني

همسات قلم نور الهدايه