صباح الفل
................
صباح الرضا و الطيبه
و القلب الابيض
و عقد الفل
دا انا كنت فاكرك
حبيبتي لوحدي
بصيت لقيتك
حبيبة الكل
.
بمد ايدي
هاتي ايديك
و احضنيني
ياللي حبك
بحر عشق
اتمد من قلبي
لوريدي
.
و لو الخسيس مره حاول
يوم يعتدي
او حتي فكر
و ف خياله
قال ابتدي
مفيهاش فصال
هيلاقي قلب و لا الاسد
واقف ف وشه
و يقوله لو كنت راجل
قوم اعتدي
.
زرعتي حب
زرعتي كره
ميهمنيش
انا مهما اشرق او اغرب
انا مهما ابعد او اقرب
سكناني و فيكي
بعيش
.
هفتح بيباني
و شبابيكي
هعيد و ازيد
و هقول فيكي
و لو فيوم حسيتي
ببرد
برموش عيوني
اغطيكي
.
يا ما انجرحتي
و شيلتي الهم
نزفتي و كانت
دموعك دم
دا انتي البهيه
يا زهره و نديه
يا اجمل شقيقه
ف بنات العم
.
يا سمره و سمارك
بلون الحنين
يا بيضه يا شقره
يا فرح السنين
مفطوم علي حبك
و دايب انا
من قبل حتي
ما ابقي جنين
.
بتقولي قلبي حنين؟
قلبك دا يطلع ايه
.
لو عشقي عشق صافي
اقول ف عشقك ايه؟
.
لو حبي نبع الدفا
من نور عينكي ارويه
.
قلبي اللي حبك عشق
و لا حد سمي عليه
.
انتي اللي حبك الم
و انتي اللي حبك نغم
و كل ما ابعد و اهرب
تنادي اقولك نعم
.
حبك دا فرض عليا
يا غاليه يا ارض الكرم
.
.
...........محمد عطية
0 التعليقات:
إرسال تعليق