مقتطفات بقلم الأستاذ ..Morcos Ekladios

بيقولوا
سكة الفرح تمشيلها بلاد
و سكة الحزن ماشية وياك
انا عندى رأى تانى
ان سكة الفرح و سكة الحزن
هيا المسافة بين عقلك و قلبك
و السكة دى جواك
اللى مجننى ان الانسان
بوعى كامل و ارادة تامة
بيختار يبقى شيطان
مع انه يقدر يبقى ملاك

يعنى مثلا لما بتفرح
ايه اللى يمنع تفرح حد معاك
و لما ربنا يديلك
ليه ما تديش
زى ما ربنا اداك
و انت بتصلى
بتحس ان ربنا شايفك
طب ليه بعد الصلاة
بتفتكر انه نساك
بالحق تعالى قوللى
ازاى تبقى ملاك
و انت مصاحب شياطين
منهم الحاسدين
و القرارين
و اللى يكسروا المقاديف
و الموسوسين
لازم تصاحب ناس
من ربنا تقربك مش تبعدك
توصلك مش تتوهك
و تبذل مجهود
مهما كان المردود
اصل مجهودك يبين ان ربنا موجود
بدع الوجود
و جعل الخلود
و تصدق النية
النية تبقى خير
للبشر و الشجر و الحجر و الطير
صدقنى بكدة تبقى ملاك
تعالى نبتدى و نشجع بعضنا
هتلاقى سكة الحزن يمشولها بلاد
و سكة الفرح ماشية وياك
عشان هتبقى قصرت السكة
بين عقلك و قلبك
السكة اللى سبق و قلنا انها جواك
الشاعر العجوز

*****

January 1 at 8:18am

طول عمرى مقتنع
ان ربنا ادانا الحياة
عشان نتمتع بيها
ربنا خلقنا عشان يفرحنا
و يشركنا فى ملكه
عشان نعبده ماشى
ما كل الخلايق بتسبح بحمده

انما الانسان جبروت
اخترع قانون الملكية
و قال الارض ملكى مش ملكه
و رغم ان حياتنا من الاصل من ربنا
و احنا خدناها بامره
ابتدى الانسان يحكم
على عقل الانسان و قلبه
و تصدق على ايمانه
و بقى يحكم بقتله
صعب اوى الانسان
لكن يا خسارة مغرور و موهوم
لأن ربنا فوق الكل
و هيفضل الملك
ليوم الملك ملكه
و هيفضل الأمر
ليوم الأمر امره
الشاعر العجوز

*******